Pirs: Yekî ku rewşa wî ya madî nebaş e, tu dahatuyeke wî ya sabit jî tune ye û ji ber ku seqet e jî nikare tu kar û xebatekê bike, miqdarek pereyê wî heye. Ev kesê ha, gelo ji bo debara jiyana xwe, dikare pereyê xwe bi faîzê di Bankekê de razêne û faîzê bigire?
Bersiv: Di dînê me de faîz, ji bo her misilmanî bi awayekî teqez, hatiye qedexekirin. Seqetî, betalî, meriv ji ticaretê fêhm neke û rewşên mîna wan, faîzê rewa û meşrû nadêrin û nabin sedem ji bo ku meriv faîzê bistîne, bigire.
Xwedê Teala wiha ferman dike:
“Ên ku ribayê dixwin, tevgera wan mîna tevgera kesê ku şeytan ketibe hundirê wî û bi aqlê wî lîstibe. Ev, bi sedem ku dibêjin ‘kirîn û firotin jî her wekî selefê ye’. Hal ev e ku Xwedê kirîn û firotin helal kiriye û selef jî heram kiriye. Êdî ji vêga û pê de ji kê re ji cem Xwedayê wî şîretek were û ew dev ji selefê berde, vêca tiştên berê bûne jê re ne û karê wî spareyî Xwedê ye. Kî dîsa li selefê vegere, ha ew ehlê êgir in û heta hetayê dê tê de bimînin.
Xwedê selefê kêm dike û sedeqeyan jî pir dike. Xwedê ji hemî nankorên gunehkar hez nake.
Bêguman ew ên ku bawerî anîn û karên rind kirin, bi duristî û berdewamî nimêj kirin û zekat dane, ji wan re li cem Perwerdegarê wan xelata wan heye û ne tirs li ser wan heye û ne jî ew xemgîn dibin.
Gelî bawermendan! Ji Xwedê bitirsin. Eger birastî hûn xwedanbawer in ji selefê çi mabe dev jê berdin.
Eger hûn vê nekin bizanin ku; ji aliyê Xwedê û Qasidê wî ve li hemberî we şerekî dijwar heye. Eger hûn poşman bibin, jê vegerin, vêca sermiyanê we her ji we re ye; ne hûn zilmê bikin û bila li we jî zilm neyê kirin.”[1]
Eger meriv bi xwe nikaribe pereyê xwe di ticaretê de bixebitîne, bi kesên ku meriv bi wan ewle ye ayn jî bi saziyên finansê yên ku faîzê nakin -li ser hevpariya kar û zirarê-, meriv dikare hevpariyên curbicur pêk bîne û pereyê xwe bide xebitandin.
